Rom 13 | AMNAMANAB | STEP | Afa sa mungwali el gavmanim ahnai skaufini afa gavman mas esugba pugui amo eba God ehengelim kigmog faig. Afa ehe mungwali gavmanim esenigba asa afohug.

Romans 13

Sa big gavmanim ahnai skaufini

1 Afa sa mungwali el gavmanim ahnai skaufini afa gavman mas esugba pugui amo eba God ehengelim kigmog faig. Afa ehe mungwali gavmanim esenigba asa afohug.

2 Asa amban gavmanim filafeg eba ne filafeg mangwal God sa eseg. Afa amban el enaig eseg eba ehe hefum susug hugufla blug.

3 Afa el suialag nihe eseg mas misog elim embefenai afa amtakwalig el eba naho embefig. Atiaho ne membeg misog elim embefig fwainig? Afa sa ne suialag nihe ese eba sa misog el nem suialag mo faife.

4 Afa enag el eba Godna gafugag el fig asa nem kwaganigim. Afa ne amtakwalig nihe feba sa ne ehem embefini eba ehe mungwag esig el fig. Afa ehe Godna gafugag el afa maia el amtakwalig esegba asa God enam ninimug eba sa enag misog el ehem susug faig.

5 Asa ne gavmanim ahnai skaufini. Afa sa ne onigig amtakwalig mungwag flagim afa sa ne olugi nai suialag onigig patalfu.

6 Afa sa ne enamho onigigim asa ne takis kigba gavmanim fatinig. Afa maia misog el heafgelni gafugag esigbi eba ehengel Godna gafugagim esig.

7 Afa mangwal gavmanim faigim safeg eba sa ne fai. Afa haig haig takis sa ne fatinigim afa enaig elimba sa ne angug higinam afa suialag onam afa sa ehem esena.

Elim membenig nihe eba goseg

8 Afa masa ne elni esug flagim mungwag faig nihem fwahafe sa ne mungwali mungwag auguinim. Afa mungua mo sa ne kehla eba elim mungwag faig eba nimbeafum membug nihe feg afa enag ese awaiefe. Afa amban mingnag elim sa membenig eba nihe mom nemug patalkug.

9 Afa nihe mo enaig esog, nofeka aga taitu afa nofeka elim kwagaitifi afa nofeka ukwefi afa nofeka mingnag elni gawigim membegoni. Afa ena nihe mi afa mungwali mingnag nihe mi eba enag mungu nihe la seaifugo eba enaig esog, sa ne mingnag elim membeni eba sa ne nimbefim membfafefe.

10 Afa membug nihe eba mas elim amtanafenai afa maia ne enag nihe esegba eba ne mungwali nihe mo patalkug.

11 Afa ne anwenafig enag osuna ati meyiofe asa ne enag nihe esi. Afa enag osuna God bigim heafna kembig gam wankafe eba muhla feg asa glau sa ne nongiginai mo buihianam suialag gafugag esi. Afa maia nengelni olug onigig mulug fenibi enag osuna membi fiahfena afa glau eba ati muhla muhla fe blo.

12 Afa si ati ohuguka afa osu ati meyiofe puguiagim. Sa big sikulufegna nihe fwahinim afa ombusugni hagigna wag lambim.

13 Afa sa big suialag nihem eseafu ofenaiba el ombusug yi esig. Nofeka amtakwalig nihe fwina ufwiafim afa uflogna bugina ahganam afa aga taitu afa moiniaini fiahgi afa ninimule fi afa mingnag elim ambobuge gonim. Nofeka enaig esi.

14 Sa ne Ainiyag Sisas Kraisna nihem flinim kehli afa nofeka eligni amtakwalig sawiegim angug higina.